ПОСТОЈАТ МНОГУ НАЧИНИ ДА ПРИДОНЕСЕШ КОН СПРЕЧУВАЊЕ НА ТРГОВИЈАТА СО ДЕЦА И ДЕВОЈКИ, А ЕДЕН ОД НИВ Е СПОДЕЛУВАЊЕ НА ОВИЕ ПЕТ ВИДЕА!

Соодветната едукација и препознавање на формите на трговија со луѓе е клучно за да знаеме како да се заштитиме, како да реагираме, како да постапиме, и како истото да го пријавиме. Соодветната едукација ќе придонесе кон поголема заштита и превенирање младите да не влезат во синџирот на трговија со луѓе.

Подржете ја онлајн кампањата преку споделување на едукативните промотивни видеа подготвени од страна на средношколците од 10 средни училишта од Скопје, Куманово, Тетово, Прилеп и Штип, како активни актери во општеството, млади лидери – промотори во спречување и превенција од трговијата со деца.

Учествувај и ти, сподели ги видеата преку твоите профили на социјални мрежи и други канали за комуникација и придонеси младите и општата јавност да се едуцираат, да знаат како да препознаат и избегнат можни случаеви на трговија со луѓе, како и да се охрабрат да пријават доколку забележат дека им се случува ваква злоупотреба!

Во подготовката на промотивните видеа земаа учество ученици од средните училишта: СОУ „Никола Штејн“ – Тетово, СОУ „Орде Чопела” – Прилеп, СОУ „Ѓорче Петров” – Прилеп, СОУ „Димитар Мирасчиев“- Штип, СОУ „Коле Нехтенин“”- Штип, СОУ ,,Јане Сандански” – Штип, СОУ „Перо Наков“- Куманово, СУГС „Шаип Јусуф“- Скопје, и СУГС „Арсени Јовков“ – Скопје.

Милиони млади и деца, жени, но и мажи, секојдневно се принудуваат на проституција, питачење, слугување во куќи, работа на плантажи и на други видови принуда. Се проценува дека на меѓународно ниво денес има помеѓу 20 и 40 милиони луѓе жртви на трговија со луѓе. Според деветиот Генерален извештај на ГРЕТА, објавен март 2020 година, во Европа се забележува тренд на зголемување на идентификувани жртви на трговија со луѓе за 45%, притоа бројката на идентификувани жртви на трговија со луѓе во Европа во 2018 година е околу 15 300 лица. Во Македонија бројот на идентификувани жртви на трговија со луѓе во 2018 година е 9, од кои поголемиот дел се малолетни лица. Според Извештајот на Националната комисија за борба против трговија со луѓе и илегална миграција, во 2019 година во РСМ од страна на институциите се идентификувани 6 жртви на трговија со луѓе, од кои 4 се деца, од женски пол. 86 потенцијални жртви на трговија со луѓе и тоа 67 женски и 19 се машки; од кои: 62 лица под 19 години, додека 24 лица се на возраст од 19-50 години). Во РСМ злоупотребата на деца преку присилна сексуална експлоатација, присилните бракови и трудовата експлоатација се доминанти форми на трговија со луѓе, а најголемиот број евидентирани деца жртви на трговија се женски деца на возраст од 14 до 16 години.